سياسة الخصوصية

مين إحنا

«من المالك» موقع بيعرض شقق للإيجار في مصر من أصحابها الحقيقيين مباشرة، من غير عمولة. الصفحة دي بتشرح بكلام بسيط إيه البيانات اللي بناخدها منك، وليه، ومين بيشوفها، وبنحتفظ بيها قد إيه.

البيانات اللي بناخدها

• بيانات الحساب: إيميلك، وكلمة سر لو اخترت التسجيل بالإيميل. كلمة السر بتتخزن كقيمة مشفّرة أحادية الاتجاه عند مزوّد الخدمة (Supabase)، وإحنا مش بنقدر نشوفها.
• لو اخترت تدخل باستخدام Google، بناخد معرّف حسابك وإيميلك وبيانات الملف الأساسية اللي Google بيشاركها، زي الاسم والصورة، عشان نعمل حسابك أو ندخّلك عليه عن طريق Supabase. مش بناخد باسورد Google، ومش بنطلب صلاحية لقراءة رسايل Gmail أو ملفات Drive. تسجيل الدخول مش اعتماد للهوية أو ملكية العقار؛ دول ليهم مراجعة منفصلة.
• اسمك القانوني ورقم موبايلك.
• لو بتعرض شقة: تفاصيل الإعلان وصوره، والعنوان بالظبط، وصورة البطاقة الشخصية، ومستند يثبت ملكية المكان باسمك. ولو بعتّ فاتورة كهربا أو غاز، دي بتساعد في المراجعة بس، ولوحدها مش إثبات ملكية.
• سجل التواصل: مين فتح رقم مالك أو بدأ معاه محادثة وإمتى. ده عشان نحسب حد التواصل اليومي ونوقف جمع الأرقام والإزعاج.
• البلاغات اللي بتبعتها عن إعلانات، والرسايل اللي بتبعتها لنا.
• لو المالك اختار التواصل بالرسايل: الرسايل اللي بتتبعت بين المستأجر والمالك على الإعلان جوه الموقع.
• طلبات حذف الحساب والبيانات: تاريخ الطلب وحالته (اتسجل، بيتراجع، اتلغى) في محادثتك مع الفريق.
• لو بدأنا تواصل مدفوع في المستقبل، هنحدّث السياسة دي قبل ما نجمع أي بيانات دفع. مفيش دفع للتواصل على الموقع دلوقتي.

بنستخدمها في إيه

• عشان نشغّل حسابك ونخليك تدخل عليه.
• عشان نراجع بإيدنا إن اللي بيعرض الشقة هو المالك الحقيقي، ونطابق البطاقة مع مستند الملكية.
• عشان نفكّر المالك يأكّد إن الشقة لسه متاحة، ونقفل الإعلانات اللي اتأجرت.
• عشان نحمي الناس من السماسرة والإعلانات المضروبة وجمع الأرقام، ونراجع البلاغات.
• عشان نرد عليك لو كلمتنا، ونبعتلك رسايل عن حسابك أو إعلانك (زي تأكيد الإتاحة).

مش بنبيع بياناتك لحد، ومش بنستخدمها في إعلانات لجهات تانية.

مين بيشوف إيه

• أي حد: صور الشقة، والمنطقة بس (مش العنوان بالظبط)، والسعر، والتفاصيل.
• رقم المالك: بيظهر بس للي سجّل دخول لو المالك اختار التواصل بالتليفون. فتح الرقم وبدء محادثة على نفس الإعلان بيتحسبوا تواصل واحد من حد الـ٢٠ تواصل جديد في اليوم لكل حساب.
• البطاقة ومستند الملكية: متخزنين في مخزن خاص. محدش يقدر يفتحهم غير صاحب الإعلان نفسه وفريق المراجعة، وده بلينك بيشتغل حوالي دقيقتين بس. مش بيظهروا للمستأجرين أبدًا.
• العنوان بالظبط: خاص بالمالك وفريق المراجعة. المالك هو اللي يقرر يقوله للمستأجر لما يتكلموا.
• رسايل المحادثة على إعلان: بيشوفها الطرفين اللي في المحادثة بس، ومش بتظهر لأي حد تاني على الموقع. طلبات الحذف ورسايلك للفريق بتروح لمحادثة الدعم الخاصة بيك، مش للمالك.

بياناتك متخزنة فين

بنستخدم Supabase للحسابات وقاعدة البيانات والملفات، وسيرفراتهم اللي بنستخدمها في الاتحاد الأوروبي (فرانكفورت، ألمانيا). يعني بياناتك بتتخزن برّه مصر. مش بنشارك بياناتك مع حد تاني غير مزوّدي الخدمة اللي محتاجينهم عشان الموقع يشتغل، أو لو جهة رسمية طلبتها بشكل قانوني.

بنحتفظ بيها قد إيه

• البطاقة ومستند الملكية: طول ما حسابك أو إعلانك شغال، عشان المراجعة ولو حصل خلاف أو بلاغ.
• المسح مش أوتوماتيك: لما تشيل الإعلان، أو تطلب مننا نمسح المستندات أو الحساب، فريقنا بيمسحها بإيده خلال ٩٠ يوم بالكتير.
• بيانات الحساب وسجل التواصل: طول ما حسابك موجود. لما تطلب مسح الحساب، فريقنا بيمسحها بإيده في نفس المدة (٩٠ يوم بالكتير).
• طلب الحذف بيتسجل الأول، وتقدر تلغيه طول ما الفريق لسه ما بدأش يراجعه. تسجيل الطلب مش معناه إن البيانات اتمسحت؛ المسح بيتعمل بإيد الفريق بعد المراجعة.

على جهازك

بنحفظ اختيار اللغة في كوكي صغيرة. الشقق اللي حفظتها ومسودة إعلانك ممكن تتحفظ في المتصفح على جهازك. مش بنستخدم كوكيز إعلانات.

الأمان

بنحاول نحمي بياناتك: المستندات في مخزن خاص، والوصول ليها محدود ولوقت قصير. بس مفيش نظام على الإنترنت أمان ١٠٠٪، فلو حصل تسريب يأثر عليك هنبلّغك.

حقوقك

من حقك تعرف إيه البيانات اللي عندنا عنك، وتصلّحها، وتطلب نمسحها، أو تعترض على استخدامها. ده في إطار قانون حماية البيانات الشخصية المصري رقم ١٥١ لسنة ٢٠٢٠. ابعتلنا على الإيميل اللي تحت، وهنرد عليك.

التعديلات

النص ده ممكن يتعدّل مع تطوّر الموقع، ولسه ما اتراجعش من محامي. لو غيّرنا حاجة مهمة هنكتبها هنا ونغيّر تاريخ آخر تحديث.

تواصل معانا

لأسئلة الخصوصية أو طلب حذف الحساب والبيانات، كلّمنا من جوه الموقع أو ابعت إيميل على help@menelmalek.com.